Эндиликда Бухорода маҳаллий ва чет эллик сайёҳлар учун инновацион мобиль иловаси тайёрланмоқда. Бошқача айтганда, Ўзбекистон Республикаси Президентининг шу йил 28 апрелдаги “Рақамли иқтисодиёт ва электрон ҳукуматни кенг жорий этиш чора-тадбирлари тўғрисида”ги Қарорига асосан иқтисодиётнинг кенг тармоқлари, шунингдек, ҳукумат фаолиятини босқичма-босқич рақамлаштириш бўйича жумладан, вилоят бошқармаси томонидан ҳам қатор инновацион лойиҳалар ишлаб чиқилмоқда.
Кенгроқ тўхталадиган бўлсак, республика Вазирлар Маҳкамасининг 2019 йил 4 октябрдаги “Моддий-маданий мероснинг кўчмас мулк объектлари миллий рўйхатини тасдиқлаш тўғрисида”ги қарорига мувофиқ вилоятимизда моддий-маданий мероснинг кўчмас мулк объектлари алоҳида хатловдан ўтказилган. Миллий рўйхатга айни кунда ҳудудда мавжуд жами 829 та моддий-маданий мерос объекти киритилиб, давлат муҳофазасига олинган. Шундан 287 таси археология ёдгорлиги, 31 таси мадраса, 105 таси масжид, 14 таси мақбарадир.
Бундан ташқари, вилоятимиз маркази ва шаҳар-туманлар ҳудудида жами 133 та архитектура ансамбли, 15 та карвонсарой, 4 та тим ва тоқ, 18 та диққатга сазовор меъморий обида, тарихий аҳамиятга эга 122 та қадимий уй-жой, алоҳида меъморий ёдгорлик мажмуи туркумига кирган 83 та иншоот, қолаверса, 17 та монументал ёдгорлик давлат муҳофазасига олингани билан аҳамиятли.
Вилоят маданий мерос бошқармаси ташаббуси билан айни кунда вилоятдаги мавжуд маданий меърос объектлари тўғрисидаги маълумотларни излаш, жамлаш ва улар тўғрисидаги янги маълумотларни киритиш, географик маълумотларни (объектларгача етиб бориш тўғрисидаги) ўзида мужассамлаштирган ахборот тизимини жорий этишга доир инновацион мобиль иловаси концепцияси ишлаб чиқилди.
Мазкур инновацион мобиль илованинг афзаллиги маданий мерос объектларини кўриш истагида бўлган фуқаролар, хорижий меҳмонлар, маҳаллий саёҳатчилар, тарихчи-олимлар ёки соҳа мутахассислари ҳеч қандай қийинчиликсиз ўзлари кўзлаган манзилга етиб боришлари мумкин бўлади. Ахборот технологиялари ривожланган ҳозирги даврда саёҳатга ошиққан одам борки, мазкур мобиль иловани қўл телефонига юклаб олса, бу “йўл кўрсатувчи харита” улар учун фақат фойдадан холи эмас, сафарда жуда асқотади. Ҳозирда қадим ва ҳамиша навқирон шаҳримизга ташриф буюрувчи сайёҳлар талабларини инобатга олган ҳолда бу мобиль илова лойиҳасини янада такомиллаштириш устида иш олиб борилмоқда.
