Бугун ижтимоий тармоқларда Бухоро вилоят Бухоро шаҳри ИИБ биносида, 1985-йилда Вобкент туманида туғилган фуқаро Ҳ.Қ вафот этган бўлиши мумкинлиги тўғрисида хабарлар тарқалди.
Хабарда айтилишича, марҳум машина савдоси билан шуғулланган. Харидорлар билан пул бўйича муаммо келиб чиққани сабабли уни ИИБ биносига чақиришган.
29 ноябрь куни эса унинг укасига телефон қилиб, унга акасини олиб кетиши мумкинлигини айтишган. Марҳумнинг укаси ИИБ биносига келганида уни тез ёрдам олиб кетганини айтишган.
Унинг яқинлари тез ёрдам биносига боришса, марҳум аллақачон вафот этган бўлган. Унинг танасида қийноқ ва жароҳат излари, хусусан бош қисми қаттиқ шикастланганлигини кўришган.
Шунингдек, бош прокурорнинг матбуот котиби Хаёт Шамсутдинов мазкур хабар юзасидан расмий муносабат билдирди. Унга кўра, ушбу ҳолат бўйича ўрганиш ишлари бошланган.
Бундан ташқари, матбуот котиби ўрганиш натижалари юзасидан расмий баёнот берилишини қўшимча қилган.
