Аввал босқинчилик ва гиёҳванд моддалар етиштириш билан айбланган фуқаро бу гал маст ҳолатда хотинини қасддан пичоқлаб ўлдирди. У суд ҳукми билан 13 йилга қамалди. Бу ҳақда «Xabar.uz»га Жиноят ишлари бўйича Вобкент тумани суди томонидан маълумот берилди.
Маълум қилинишича, укасининг уйидан маст ҳолатда қайтган ва турмуш ўртоғи билан ўзаро келишмовчилик сабабли жанжаллашиб қолган. Кўзига қон тўлган жиноятчи 25 йил бирга яшаб келган хотинининг чап томон кўкраги юқори қисмидан бир маротаба тепадан-пастга йўналишда зарб билан урган. Аёл ерга йиқилиб, воқеа жойида вафот этган.
Жиноят ишлари бўйича Вобкент туман суди ҳукмига кўра, айбланувчи Ўзбекистон Республикаси Жиноят кодекси 97-моддасининг (Қасддан одам ўлдириш. Айбланувчи ўн йилдан ўн беш йилгача озодликдан маҳрум қилиш билан жазоланади) 1-қисмида назарда тутилган жиноятни содир этганликда айбли, деб топилган ва унга шу модда билан 13 йил озодликдан маҳрум қилиш жазоси тайинланган.
