Ўзбекистон републикаси Президентининг 2020 йил 26 мартдаги ПҚ-4652 сонли “Коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимларини қўллаб қувватлашга оид қўшимча чора-тадбирлар тўғрисида”ги қарорига асосан бугун, 3 августь куни тумандаги карантин зонасида ўз соғлиғини аямасдан, халқ олдидаги масьулият, ватанпарварлик, фидоийлик каби хислатларни ўзларида намоён этиб, коронавирус инфекциясидан зарарланган беморлар билан мулокотга киришиб, уларнинг оёққа туришларига катта ҳисса қўшган 45 нафар тиббиёт ходимларига 659,3 миллион сўм миқдорида махсус рағбатлантириш ва қўшимча кунлик тўловлар тўлаб берилди.
Жумладан ўтган 14 кунлик фаолияти даври учун барча солиқлардан ташқари 11 нафар шифокорга 25 миллион сўмдан, 20 нафар ҳамшира ва лаборантларга 15 миллион сўмдан, 9 нафар кичик тиббиёт ходимларга 10 миллион сўмдан ҳамда 5 нафар бошқа ходимларга 5 миллион сўмдан накд пул шаклида ойлик маошлари рўйхат асосида тўлиқ тўланди.
Тўловлар туман тиббиёт бирлашмасининг кўп тармоқли поликлиникасида ходимларнинг 14 кунлик фаолияти тугаши муносабати билан тарқатилди.
-Биз, ўз фаолиятимиз давомида энг замонавий тиббий муолажалар орқали беморларни даволаш баробарида уларга руҳий мадад бердик, куну-тун уларнинг ёнларида бўлдик – дейди шифокор Дилнавоз Адизова. Хизматларимиз бесамар кетмади. Улар бирин-кетин шифо топиб, ўз оиласи, яқинлари бағрига қайтишмоқда. Шахсан мен хизмат фаолиятимиз юқори даражада қадрланаётгани учун давлатимиз раҳбари ва халқимиздан миннатдорман.
Тўловлар вилоят прокуратураси, вилоят молия бошқармаси, вилоят ғазначилик бошқармаси, туман ҳокимлиги ва туман молия бўлими ходимлари иштирокида ўз эгаларига топширилди.
Маълумот учун айтиб ўтмоқчимиз айни вақтда туман тиббиёт бирлашмасининг юқумли касалликлар бўлимида 100 нафар беморлар стационар даволанмоқда.
Уларни даволаш учун эса бугун ҳамкасблари билан ўрин алмашувдан сўнг 12 нафар шифокор, 20 нафар ҳамшира ва 13 нафар кичик тиббиёт ходимлари жалб қилинди.
