Ассалому алайкум, ҳурматли нуроний отахону онахонлар, мунис опа-сингиллар, азиз тумандошлар!
Сиз, азизларни, сизлар орқали кўп миллатли халқимизни шарқона янги йил – Наврўз байрами билан чин қалбимдан самимий табриклайман. Нуроний отахон ва онахонларимизга, ҳурматли ака-ука, мунис опа-сингилларимизга, навқирон ёшларимиз, суюкли фарзандларимизга, ўзимнинг юксак ҳурмат-эҳтиромим ва энг эзгу тилакларимни изҳор этаман.
Азиз тумандошлар!
Шу тароватли кунларда табиат уйғониб, гўзал диёримизга барчамиз орзиқиб, соғиниб кутган Наврўзи олам кириб келди. Минг йиллар давомида маънавий ҳаётимизнинг кўрку зийнати бўлиб келаётган бу ажойиб, хосиятли байрам бугун қалбларимизга яна чексиз қувонч ва завқ бағишламоқда.
Наврўзи оламни биз барча Шарқ халқлари қатори азал-азалдан, минг йиллар давомида нишонлаб келмоқдамиз. Демак, Наврўз кеча ёки бугун шаклланган байрам эмас, балки ўзида минг бир тарихни мужассам этган, инсонларни меҳр-мурувватга, диёнатга бошлаган, адолат ва инсонийлик тамойилини намойиш этган қутлуғ айёмдир.
Айни шу бетакрор ва дилбар фаслда барчамиз ўзимизни яшариб кетгандек, вужудимизга янги куч-ғайрат, азму шижоат киргандек ҳис этамиз. Неча юз йиллик анъана ва қадриятларимизни янгитдан кашф этамиз, қандай буюк тарих, қандай буюк маданият ворислари эканимизни яна бир бор англаймиз ва бундан қалбларимиз ғурур ва ифтихорга тўлади.
Қадрли дўстлар!
Фурсатдан фойдаланиб, яна бир бор барчангизни янгиланиш ва яшариш айёми Наврўз байрами билан чин қалбимдан самимий табриклайман.
Наврўз ҳар бир хонадонга бахту саодат, қут-барака, тинчлик ва тотувлик олиб келсин. Эзгу амалларнинг ижобатида ҳаммага омад ҳамда туманимиз шуҳратини ошириш, барча жабҳада ютуқларни кўпайтиришда Сиз, азиз тумандошларимизга куч-қувват, аҳиллик, ҳамкорлик ва мустаҳкам ирода тилайман.
Бухоро тумани ҳокими Очилов Анваржон Зубайдуллоевич
