Бухоро тумани ҳокими Анваржон Очилов тадбиркорларни қийнаб келаётган муаммоларни ўрганди
Бухоро тумани ҳокими Анваржон Очилов сектор раҳбарлари билан биргаликда «Кунжи Қалъа» маданият маркази биносида тадбиркорликни янада ривожлантириш, инвестицияларни кенг жалб қилиш, бизнесни юритиш учун қулай имкониятлар яратиш, уларни қийнаётган муаммоларни бартараф этиш мақсадида 3-сектор ҳудудидаги тадбиркорлар билан учрашишди.
Очиқ мулоқот шаклида бўлиб ўтган учрашувда 30 дан ортиқ тадбиркорлар томонидан бизнес ва соҳани ривожлантириш учун кредитлар ажратиш, ижара масаласидаги муаммо, фаолиятини кенгайтиришда жой масаласи, ишлаб чиқариш ва хизмат кўрсатиш объектлари қурилиши билан боғлиқ масалалар кўтарилди.
Тадбиркорлар томонидан билдирилган деярли барча масалалар ижобий ечими топилиб, ҳал этиш чоралари кўрилди. Айрим ўрганиш ва вақт талаб этиладиган масалалар тегишлилиги бўйича мутасаддиларга бириктириб, ижроси назоратга олинди.
