30-июн Ёшлар куни муносабати билан байрам табриги
Азиз ёшлар!
Барчангизни юртимиз ҳаётидаги қутлуғ байрам – Ёшлар куни билан самимий табриклаб, ўзимнинг чексиз меҳрим ва эзгу тилакларимни билдиришдан ғоят мамнунман.
Бугунги кунда мамлакатимизда янги Ўзбекистонни барпо этишга қаратилган ижтимоий-сиёсий, иқтисодий ислоҳотларни амалга оширишда азму шижоатли ёшларимизнинг ўрни ва таъсири тобора ортиб бораётгани ҳаммамизни қувонтиради.
Барчамиз гувоҳмиз – бугун дунё мисли кўрилмаган суръатлар билан кескин ўзгариб бормоқда. Айни ўзгаришлар жараёнида мамлакатимизни ҳар томонлама ривожлантиришда билимли ёшларнинг илм ва салоҳиятига таянамиз!
Қадрли ўғил, қизларим!
Жонажон Ўзбекистонимизнинг истиқболи, келажаги, билимга чанқоқ, тиришқоқ, ўз соҳасининг етук мутахассиси бўлиб етишишга интилаётган забардаст ёшлар қўлида десак, ҳеч муболоға эмас.
Азиз ўғил-қизларим, ҳеч қачон унутманг, халқимиз, Ватанимиз, Президентимиз сизлардан буюк ишларни кутмоқда.
Шу муқаддас ишонч ва масъулиятни ҳар томонлама оқлаш, унга муносиб бўлиш – дунёдаги энг улуғ бахтдир. Шундай бахт, шундай шараф барчангизга насиб этсин!
Сизларни севимли байрамингиз, азму шижоат, гўзаллик ва камолот айёми – Ёшлар куни билан яна бир бор самимий табриклаб, барчангизга сиҳат-саломатлик, бахт ва омад тилайман.
Нусратилла Баракаев
Бухоро муҳандислик-технология институти ректори
