Мазкур мурожаат бўйича Қоракўл тумани ҳокимлиги матбуот хизмати қуйидагиларни маълум қилади:
Мазкур мурожаат Қоракўл туман ҳокими Хуршид Тохиров, туман прокурори Феруз Очилов, туман ИИБ бошлиғи Жамшид Расулов ва бошқа мутасадди ташкилот раҳбарлари томонидан жойига бориб ўрганилди.
Мурувват уйида даволаниб келаётган бемор Қиёмов Ўктам Ғайбуллаевич 1971 йил 20 мартда Бухоро шаҳар “Маҳмуд Торобий” кўчасида туғилиб, истиқомат қилиб келган.
Бемор 2020 йилнинг 8 январ куни Қоракўл эркаклар мурувват уйига бош мия органик касаллиги (ЧМТ-черепно мозговой травма), турғун психопатиясимон ўзгаришлар ташхиси жойлаштирилган.
Шунингдек, Ў.Қиёмов 2021 йил 14 декабрдан 2022 йил 25 январга қадар Бухоро вилоят Руҳий асаб касалликлар диспансерида даволанган.
Аниқланишича жорий йилнинг 2 август куни бемор Ўктам Қиёмов Ўзбекистон Республикаси Вазирлар маҳкамасининг 475-сон қарори 2- иловаси, “Мурувват” ногиронлиги бўлган шахслар учун интернат уйлари тўғрисида низомнинг 5-боб 33 банди (33. Васийликка олинганларнинг “Мурувват” интернат уйларидан вақтинчалик кетишига, врачнинг кетиш мумкинлиги тўғрисидаги хулосасини ҳисобга олган ҳолда, кўпи билан 1 ой муддатга рухсат берилиши мумкин. Бунинг учун директорнинг розилиги билан, қариндошлари ва бошқа шахсларнинг ёзма мажбурияти мавжуд бўлиши керак.) ва укаси Хайри Қиёмовнинг аризасига биноан 10 кун муддатга уйига олиб кетилган.
Шундан сўнг Ў.Қиёмовнинг синглиси, васий Райхон Қиёмова мурувват уйи раҳбариятига оғзаки мурожаат қилиб, беморни мурувват уйига қайтариш ва бундан кейин унинг рухсатисиз беморни уйга юбормасликларини талаб этган.
Мурожаат мурувват уйи раҳбарияти, видеода исмлари келтирилган санитарлар Ғиёс Давронов ва Ўктам Оймуродов, ошпаз Ҳамза Ҳайитовлар иштирокида тегишли тартибда муҳокама этилди.
Мурувват уйидаги назорат камералари кўздан кечирилиб, барча беморлар билан сўровномалар ва суҳбатлар ўтказилганда санитарлар ва ташкилот ҳодимлари томонидан беморларга нисбатан қилинаётган ҳеч қандай рухий ва жисмоний босимга гувоҳ бўлинмади.
Шунингдек, ижтимоий тармоқда эълон қилинган мазкур видеомурожаат Қоракўл туман ИИБ томонидан рўйхатга олиниб, ҳозирги вақтда терговгача суриштирув ишлари олиб борилмоқда.
