Бугун вилоят ҳокими Ботир Зарипов вилоят ва Бухоро шаҳри сектор раҳбарлари, тегишли ташкилот ва идоралар мутасаддилари иштирокида Бухоро шаҳрида ўтган йиллар давомида реновация дастури асосида қуриб, фойдаланишга топширилиши лозим бўлган иншоотларда бўлиб, уй-жойлар қурилишини якунлашга доир аввалги ўрганишларда берилган топшириқлар ижроси билан танишди. Бу борада дуч келинаётган муаммоларни манзилли ўрганди.
Отабой Эшонов, Ҳамза, Иброҳим Мўминов, Садриддин Айний кўчалари бўйлаб давом этган ўрганишлар жараёнида вилоят ҳокими ишларни тез ва сифатли якунлаш кераклигини қайд этди. Ичимлик суви, электр ва табиий газ таъминоти ҳамда бошқа инфратузилма билан билан боғлиқ масалаларни тенг ҳал этиш лозимлигига эътибор қаратди.
Қайд этиш жоизки, кўп қаватли уй-жойларнинг сифатли қурилиши ва фойдаланишга топширилиши алоҳида назоратга олиниб, қурилиш ишларини якунлаш бўйича режа-графиклар ишлаб чиқилган.
Шундан келиб чиқиб, вилоят ҳокими ва соҳа мутасаддилари иштирокида ҳар бир кўп қаватли уй-жой қурилиши қурилиш – монтаж ишлари жадаллаштирилиши билан боғлиқ ҳолат атрофлича муҳокама этилиб, масъуллар қатъий огоҳлантирилди. Қурилиш ишларини якунлаш ва уй-жойларни кам-кўстсиз фойдаланишга топшириш бўйича муддат белгиланди.
Қурилиш меъёрлари ва сифат талабларининг бузилишига, уйларнинг фойдаланишга қабул қилиш далолатномаларини расмийлаштиришда сансоларликка йўл қўймаслик зарурлиги алоҳида таъкидланди.
Шунингдек, вилоят раҳбари томонидан масъул-мутасаддилар зиммасига реновация асосида қурилаётган уйларда ташқи муҳандислик-коммуникация тармоқларига уланиш, ичимлик суви ва оқова сув тармоқларини барпо этиш, бино-иншоотлар атрофини ободонлаштириш ва кўкаламзорлаштириш билан боғлиқ қатор вазифалар ҳам юклатилди.
