Бугун вилоят ҳокими Ботир Зарипов Бухоро шаҳридаги қатор спорт иншоотларида бўлди.
Ўрганишларнинг дастлабки манзили спортнинг ўйин турлари ва енгил атлетика бўйича ихтисослаштирилган спорт мактабига қарашли «Хумо» спорт мажмуаси бўлди. Қайд этиш жоизки, Ўзбекистон Республикаси спорт вазирлигининг давлат-хусусий шериклик шартлари асосида мазкур мажмуанинг бино-иншоотларини реконструкция қилиш шарти бўйича ўтказилган тендерда «Амиршоҳ 777» МЧЖ ғолиб деб топилиб, мажмуада 9 млрд сўмлик мини футбол майдончасини ташкил этиш ва теннис кортларини таъмирлаб ишга тушириш лойиҳасини амалга ошириш режалаштирилган.
Ботир Зарипов лойиҳа ва иншоотда амалга оширилаётган реконструкция ишлари билан батафсил танишди. Бу бора ўзининг таклиф ва тавсияларини берди.
Навбатдаги манзил – гимнастик спорт турларига ихтисослаштирилган спорт мактаби. Маълумотларга кўра, спорт мактабида ҳозирда 48 та гуруҳда 583 нафар шуғулланувчи 20 нафар тажрибали мураббийдан бадиий гимнастика ва спорт гимнастикаси сир-асрорларини ўрганиб келмоқда.
Ботир Зарипов шуғулланувчиларга яратилган шарт-шароитлар билан танишди. Мураббийлар билан мулоқот қилиб, айни вақтга қадар эришилган натижалар, мавжуд муаммолар билан қизиқди. Доимий шуғулланувчилар сонини ошириш, миллий терма жамоа сафига маҳоратли спортчилоар етказиб бериш бўйича истиқболдаги режаларни муҳокама қилди. Бу борада мутасаддилар зиммасига қатор муҳим вазифаларни юклади.
Шунингдек, вилоят раҳбари Якка кураш спорт мактаби, Сити спорт мажмуасида ҳам бўлиб, уларда спорт билан шуғулланиш учун яратилган шарт-шароитлар билан яқиндан танишди. Мутасаддилар билан вилоятда спортнинг оммавийлигини ошириш, нуфузли беллашувларга тайёргарлик кўриш масалаларини кенг муҳокама қилди. Айрим спорт турлари бўйича юзага келган масалалар ечимига алоҳида урғу қаратилди. Шунга кўра, зарур чора-тадбирлар белгиланди.
