“Ватан ҳимоячилари” куни муносабати билан Ромитандаги бир гуруҳ ҳарбий хизматчилар тақдирланди
Бугун, 14 январь куни Ромитан туман ҳокимлигининг кичик мажлислар залида Ўзбекистон Қуролли Кучлари ташкил этилганлигининг 31 йиллиги ва 14 январь – “Ватан ҳимоячилари” куни муносабати билан тумандаги бир гуруҳ ҳарбий хизматчиларни тақдирлаш маросими бўлиб ўтди.
Тақдирлаш маросимида туман ҳокими Умеджон Барноев, туман Халқ қабулхонаси мудири, туман Кенгаши котибият мудири, туман ҳокими ўринбосарлари, тегишли корхона, ташкилот раҳбарлари, туман Мудофаа бўлими ходимлари ҳамда ҳарбий хизматчилари иштирок этди.
Туман ҳокими Умеджон Барноев йиғилганларни юртимиз тинчлиги ва халқимизнинг осуда ҳаётини тараннум этувчи айём – Ватан ҳимоячилари куни ҳамда Ўзбекистон Республикаси Қуролли Кучлари ташкил топганлигининг 31 йиллиги байрами билан қутлади.
Шундан сўнг ўз соҳасида садоқат, матонат, фидойилик кўрсатган фаол ходимларга туман ҳокимлигининг қимматбаҳо совғалари, фахрий ёрлиқлари тантанали равишда топширилди.
Тинч ва осуда юртнинг мунаввар тонгини ҳар кун улкан орзу, умидлар билан қарши олар эканмиз, жаннатмонанд Ўзбекистоннинг бахтли фуқароси эканлигимиздан фахр ва ғурур туямиз. Эришаётган ютуқларимиз, фаровон кунларимиз замирида уларнинг самимий ғамхўрлигига, тинимсиз саъй-ҳаракатларига, бедор тунларига турганлигини ҳар биримиз дилдан ҳис қиламиз.
