Андижонда эркак иккинчи хотинини ёқиб юборди

Андижон вилояти, Балиқчи туманида шаръий никоҳдаги иккинчи турмуш ўртоғини бўёқ суюлтиргич билан ёқиб юборган эркак 17 йилга озодликдан маҳрум этилди. Бу ҳақда “Дарё” хабар бермоқда.
Эркак ётоқхонада бир ўзи ухлаб ётган шаръий никоҳидаги иккинчи хотинини устига бўёқ суюлтиргич моддасини сепган. Аёл қўрқиб уйғонган вақтида қўлидаги ёндиргич билан уни ёқиб юборган. Марҳума олов алангасидан талвасага тушиб, ўзини қутқариш мақсадида уй ҳовлисига югуриб чиқиб, елим идишдаги сувни ўз устига қуйиб, оловни ўчиришга уринган.
Бироқ эркак ўзининг жиноий мақсадини охирига етказиш мақсадида яна бир бўёқ суюлтиргични жабрланувчининг устига сепиб ёқиб юборган. Аёл ўз жонини сақлаб қолиш мақсадида елим идишдаги сувни яна эгнидан қуйиб, кўчага қочиб чиққан ва қўшнисининг хонадонига яширинган. Аммо кўрсатилган тиббий ёрдамга қарамасдан олган жароҳатлари туфайли орадан 13 кун ўтиб шифохонада вафот этган.
Судда сўз олган эркакка кўра, аёлга доимий равишда сўраган пулларини бериб турган. Ишлари юришмай қолгач, бунинг имкони бўлмай қолган. Натижада аёлнинг эрига нисбатан хатти-ҳаракати ва муносабатлари ўзгарган.
“Ҳаттоки, телефон рақамимни қора рўйхатга киритиб, қўнғироқларимга жавоб ҳам бермай қўйди. Пулим борлигида яхши, ишим юришмай қолганида эса ўзини узоқлаштираётганини кўриб, уни ўлдириш фикри ҳаёлимга келди. Шу сабабли режамни амалга ошириш мақсадида юз берган воқеани амалга оширдим. Айбимни тан оламан, қилмишимдан пушаймонман”, — дейди судланувчи.
Шунингдек, суд муҳокамасида эркакнинг фирибгарлик билан шуғулланганлиги ҳам аён бўлган.
Суд ҳукми билан унга нисбатан узил-кесил ўташ учун 17 йил 6 ой муддатга озодликдан маҳрум қилиш жазоси тайинланган.