Алимент тўламаган қарздор ота 15 сутка қамалди

Алимент ундирувлари билан боғлиқ ижро ҳужжатлар ижросини таъминлаш Бюро органлари фаолиятидаги энг долзарб йўналишлардан бири эканлиги инобатга олиниб, мазкур тоифадаги ижро ҳужжатлар ижросини янада жадаллаштириш, ундирувларни кучайтириш ва келиб тушган такрорий мурожаатларни ўрганиш борасида Бюронинг Бухоро вилоят бошқармасининг Фармойиши қабул қилиниб, ишчи гуруҳларнинг асосий вазифалари белгилаб берилди.
Жумладан, жорий йилнинг 17 март куни ишчи гуруҳ аъзолари томонидан Бюронинг Когон шаҳар бўлими иш юритувидаги алимент ундирувлари билан боғлиқ айрим муаммоли ижро ҳужжатлар ўрганилиб, бўлим ходимлари билан ҳамкорликда уларнинг ижросини таъминлаш чоралари кўрилди.
Мисол учун, Бюронинг Когон шаҳар туман бўлими иш юритувида суд ижро ҳужжатига асосан қарздор Б.Адизовдан ундирувчи фойдасига вояга етмаган фарзанди таъминоти учун қарздорнинг ойлик иш ҳақи ва бошқа даромадларидан алимент ундириш ҳақида ижро ҳужжатлари мавжуд.
 Суд ҳужжатида алимент ойма-ой тўлов қилиниши белгиланган бўлсада, қарздор алимент тўловини тўлашдан бўйин товлаб келганлиги учун алимент қарздорлиги юзага келган.
Давлат ижрочиси томонидан қарздор шахсга нисбатан тегишли ҳужжатлар расмийлаштирилиб, мазмунан кўриб чиқиш учун Жиноят ишлари бўйича Когон шаҳар  судига юборилди.
Суд жараёнида қарздорнинг айби, унинг ўз айбига иқрорлик ва қилмишидан чин кўнгилдан пушаймон бўлиб берган кўрсатувидан ташқари, тушунтириш хатлари, маъмурий баённома ва ишда тўпланган бошқа ёзма далиллар билан ўз исботини топди.
Мазкур суднинг қарорига асосан қарздор Маъмурий жавобгарлик тўғрисидаги кодекснинг 474-моддасида кўрсатилган ҳуқуқбузарликни содир қилганликда айбдор деб топилиб, унга нисбатан 15 сутка маъмурий қамоқ жазоси тайинланди.
Қарздор ота суд залида дарҳол қамоққа олиниб, жазони ўташ учун махсус муассасага жойлаштирилган.
Бюронинг Бухоро вилояти бошқармаси