Айни кунларда бир гуруҳ олий таълим муассасалари раҳбарлари сафида Бухоро давлат университети ректори Обиджон Хамидов, Самарқанд давлат университети проректори Акмал Ахатов, Ўзбекистон Миллий университети проректори Хикмат Сабуров, Урганч Давлат университети проректори Зафар Ибрагимовлар жорий йилнинг 4-8-апрель кунларига мўлжалланган Ўзбекистон Республикасининг Исроил давлатидаги элчихонаси ҳамда Холон технологиялар институти ҳамкорлигида ташкил этилган “Исроилда Ўзбекистон илм-фани кунлари – халқлар дўстлигини мустаҳкамлаш йўлида” мавзусидаги халқаро анжуманда иштирок этиш, Исроилнинг етакчи олий таълим ва илмий тадқиқот муассасалари фаолияти билан танишиш, Холон технология институти билан ҳамкорлик муносабатларини муҳокама қилиш мақсадида Ўзбекистон делегацияси таркибида Исроил давлатига хизмат сафарида бўлиб турибдилар.
Анжуманда Ўзбекистоннинг Исроилдаги элчихонаси вакиллари, Холон технология институти профессор-ўқитувчилар жамоаси, Ўзбекистондан ташриф буюрган делегация қатнашди. Сафар режасига кўра, Халқаро анжуман доирасида ҲТИда таълим тизими, мавжуд имкониятлар, яратилган шароитлар билан ҳам қатнашчилар яқиндан таништирилди.
“Холон технология институтининг президенти сифатида мен Ўзбекистоннинг етакчи университетлари билан халқлар дўстлигини мустаҳкамлаш йўлидаги яқин ва ривожланиб бораётган ҳамкорлигимиздан мамнунман. Рақамли технологиялар, информатика, саноат математикаси, технологияларни бошқариш ва ўқитиш технологиялари соҳасида кадрлар тайёрлаш бўйича ҳамкорликка ҳамиша тайёрмиз. Ўзбекистонликларнинг маърифат, олий таълим ва илм-фаннинг ролини изчил оширишга қаратилган барча изланишлари, янгиликлари, олиб бораётган сиёсатлари биз учун ўта муҳим ва долзарбдир. Гап Ўзбекистон билан биргаликда илм-маърифатнинг деярли барча йўналишларида энг сўнгги юқори технологияларга асосланган янги келажакни бунёд этиши керак бўлган мутахассислар ҳақида кетмоқда” – деди Исроилнинг Холон технология институти (ҲТИ) президенти, профессор Эдуард Якубов ўз самимий фикрларини билдириш асносида.
Бугунги кунда Бухоро давлат университети ва Ҳолон технологиялар институти ўртасидаги ҳамкорлик доирасида ташкил этилган “Амалий математика ва информатика”, “Компютер билимлари” йўналишларидаги қўшма таълим дастурларида жами 87 нафар талабалар таҳсил олмоқда.
Хизмат сафарининг иккинчи кунида БухДУ ректори Обиджон Хамидов Ўзбекистон делегация билан биргаликда Исроилнинг Вейсман фан институтига ташриф буюришди. Меҳмонларни Вейсман фан институтининг Кимё факултети Материаллар ва интерфейслар бўлими бошлиғи Др. Уляна Шиманович институт тарихи, илмий фаолияти билан яқиндан таништирди.
Магистратура ҳамда докторантура босқичида тадқиқотчиларни тайёрлайдиган, мактабларда ва жамоатчиликда аниқ ва табиий фанлар таълимини ривожлантиришга алоҳида эътибор берадиган ушбу институтда математика, информатика, физика, кимё, биокимё ва биология бўйича олимлар етиштирилади. Ташриф натижаси ўлароқ, информатика, физика, кимё, биология йўналишларида магистрлар тайёрлаш ва адабиётлар алмашинуви масалаларида келишувга эришилди.
Вейсман институти дунёдаги етакчи фундаментал тадқиқот институтларидан биридир. У бешта бўлим — биология, биокимё, кимё, математика ва информатика ҳамда физика бўйича 250 та экспериментал ва назарий тадқиқот гуруҳларидан иборат. Унинг лабораторияларида пайдо бўлган ғоялар инсон танаси ва коинот ҳақида фундаментал тушунча беришга ёрдам беради ва тиббиёт, технология ва атроф-муҳит соҳасидаги ютуқларга олиб келади. Вейсман институти мактабларда ва аҳоли ўртасида фан таълимини ривожлантиришга катта эътибор беради. Ушбу дастур Вейсман фан институтининг таълим бўлими бўлган Девидсон Фан таълими институти томонидан илгари сурилиб, илмий саводхон жамиятни тарбиялаш ва тарбиялаш орқали Исроилда етакчилик қилмоқда. Бундан ташқари, Вейсман институти ва Девидсон институти минглаб фан ва математика ўқитувчиларини тайёрлайди, халқаро рақобатбардош ёзги илмий лагерлар ва турнирларни ўтказади ҳамда талабалар ва жамоатчилик учун кенг кўламли дастурларни таклиф этади.
БухДУ ректори Обиджон Хамидов иштирокидаги Ўзбекистон делегацияси ташрифнинг учинчи кунида Қуддус яҳудий университети раҳбарияти билан учрашиб университетлараро ҳамкорлик алоқаларини ташкил этиш ва уни мустаҳкамлаш йўлида учрашув ўтказди.
Делегацияни Қуддус яҳудий университети вице президенти Орон Шагрир ҳамда Гуманитар фанлар факултети Ислом ва Яқин Шарқшунослик кафедраси профессори Мичаел Шенкар қабул қилиб олишиб, уларга университет тарихи, талабалар сони, жаҳон рейтингидаги ўрни, магистрлик лойиҳалар, археология, агрономия, тарих бўйича стажировка, илмий изланишлар, PhD дастурлар бўйича маълумотлар беришди.
Маълумот ўрнида айтиш жоизки, Қуддус яҳудий университети Исроилдаги энг йирик илмий ва таълим марказидир. Қуддус яҳудий университети дунёга машҳур профессор ва олимлар, шунингдек, Нобел мукофоти совриндорлари билан машҳур. 1918 йилда ташкил этилган, 1925 йилда очилган, мамлакатдаги биринчи университет ва иккинчи олий ўқув юртига айланди. Ташкил этилганидан бери университетда таълим яҳудий тилида олиб борилади.
Астероид (271763) Қуддус яҳудий университети номи билан аталган. 2018-йилда у дунёнинг 100 та энг яхши университетлари қаторига кирди (95-ўрин). QS World university ratings маълумотларига кўра, бу мамлакатдаги энг яхши олий таълим муассасаси.
Қуддус яҳудий университети рақамларда: 23500 талаба, тадқиқотчилар 973, 7 та факултет, 6 та кампус, 14 та мактаб, 200 дан ортиқ мутахассисликлар ва дастурлар, 5000 дан ортиқ курслар.
Нуфузли мукофотлар 8 та Нобел мукофоти. Глобал қамров: 24 мамлакатда 95 та академик муассасада 208 та талаба алмашинув дастурлари, 26 мамлакатдан 220 нафар илмий тадқиқотчилар, 44 давлатдаги институтлар билан 320 та академик келишув.
Ўзбекистон билан ҳамкорлик узоқ, мустаҳкам ва давом этмоқда, шунингдек, 2019 йилда Ўзбекистонда ўтказилган СТЕММ конференцияси (фан, технология, таълим, математика ва тиббиёт) каби халқаро конференциялар, халқаро йиғилишларни ўз ичига олади. Анжуманда икки мамлакат ўртасидаги ҳамкорликни мустаҳкамловчи янги илмий ташаббус ва йўналишларни муҳокама қилиш ва ривожлантириш мақсадида турли соҳа олимлари ва мутахассислари тўпланди.
Анжуманнинг беш куни давомида ўқитиш ва лойиҳалаш технологиялари, маълумотлар фанлари ва тиббиёт, амалий математика, Нано-технологиялар, комплекс таҳлил ва долзарб илмий муаммолар каби турли мавзуларда маърузалар ва мунозаралар бўлиб ўтди. Кейинчалик қўшимча учрашувлар ва конференциялар, шу жумладан инновациялар ҳафталиги бўлиб ўтди, уларнинг барчаси Ўзбекистон учун муҳим йўналишларга бағишланган ва уларнинг барчаси Холон технология институти ташаббуси билан ташкил этилган.
Холон технология институти шунингдек, ўзбекистонлик ёш олимларга Ғарб мамлакатларида улар учун кўплаб эшикларни очган нуфузли “Спрингер” нашриётида тадқиқот мақолаларини чоп этишда кўмаклашди.
Холон технология институти делегациянинг ташрифи Ўзбекистоннинг Исроилдаги элчихонаси томонидан қўллаб-қувватланди, бу саноат дизайни, интерер дизайни, визуал алоқа дизайни, туризм технологиялари ва қишлоқ хўжалиги инновациялари каби кўплаб соҳаларда мамлакатлар ўртасидаги алоқаларни мустаҳкамлаш ва ҳамкорликни кенгайтиришда янги ва муҳим саҳифа очди.
Рустам Раҳимбоев,
БухДУ Жисмоний маданият факультети талабаси
