Ромитан туманининг Алишер Навоий ва Бобур маҳаллаларини боғловчи кўприк белгиланган ҳажмдан оғир бўлган юк машиналарининг қатнови боис таъмирталаб аҳволга келиб қолганлиги натижасида ҳар иккала маҳалла аҳолиси қолаверса бу ердан ўтиб қайтувчилар учун жуда катта муаммо ва ташвиш туғдираётган эди. Фуқаролар бир-неча йиллар давомида ушбу муаммонинг ечимини ҳал этиб беришларини сўраб тегишли идораларга мурожаат қилганлар.
Бугун эса халқнинг азалий орзуси ушалди. Вазирлар Маҳкамасининг 614-сонли қарорига асосан Ромитан тумани “А.Навоий” МФЙ ҳудудидан ўтувчи 4к-168д “4Р-48 автойўлидан 4Р-68 автойўлига Шахобча” автомобиль йўлидаги кўприкни реконструкция қилиш натижасида замонавий тарзда янги кўприк мустаҳкам қурилиб, фойдаланишга топширилди.
Очилиш маросимида туман ҳокими Умеджон Барноев бошчилигида сектор раҳбарлари, ҳоким ўринбосарлари, тегишли ташкилот, корхона вакиллари, туман ИИБ, ЙҲХБ вакиллари, қолаверса, маҳаллий аҳоли, нуроний отахонлар ҳамда маҳалла фаоллари иштирок этишди.
Очилиш давомида яхши ниятлар билан қуръон тиловат қилиниб, маҳаллий аҳоли, нуроний отахонлар ҳамда маҳалла фаоллари учун дастурхон ёзилди. Шунингдек, ушбу кўприк қурилишида иштирок этган Ромитан туман йўллардан фойдаланиш унитар” корхонаси ходимларига туман ҳокимлигининг эсдалик совғалари топширилди.
Мазкур кўприкнинг узунлиги 30 метрни, эни эса 15 метрни ташкил этади. Янги кўприк 30-40 тоннагача юк кўтариш қувватига эга.
Лойиҳанинг умумий қиймати 2 млрд 167 млн сўмни ташкил этиб, қурилиш ишлари “Ромитан туман йўллардан фойдаланиш унитар” корхонаси томонидан амалга оширилди.
