Ўзгартиришлар Савдо-саноат палатасига аъзо бўлишни режалаштираётган тадбиркорлик субъектлари ва қимматбаҳо металлар билан шуғулланувчи якка тартибдаги тадбиркорларга таъсир қилади.

Norma.uz маълумотларига кўра, жорий йил 1 февралдан бошлаб қуйидаги ўзгартириш ва янгиликлар назарда тутилган:

Aдвокатларнинг ордерлари электрон шаклга ўтади

Aдвокат тузилмалари муайян ишни юритиш учун анъанавий шаклдаги буйруқ мақомига тенглаштирилган QR кодли “Электрон адвокат буйруғи” чиқаради.

Aйрим тадбиркорлик субектлари ССПга йиғим тўлашдан озод қилинади

Микро, кичик ва ўрта бизнес субъектлари Савдо-саноат палатасига кириш ва аъзолик бадаллари тўламасдан аъзоликка қабул қилинади. Улар палатанинг аъзолик билан боғлиқ хизматларидан тўлиқ фойдаланиш ҳуқуқига эга. ССП томонидан кўрсатилиши мумкин бўлган қўшимча пуллик хизматлар бундан мустасно.

Қимматбаҳо металларни сотувчи якка тартибдаги тадбиркорлар банк кафолатини тақдим этадилар

Қимматбаҳо металларни товар биржаси орқали тўловни кечиктириш шарти билан сотишда қуйидагиларга йўл қўйилади:

• сотиб олинган қимматбаҳо металлар бўйича тўлов мажбуриятларини “Ўзмиллийбанк” AК кафолати, шунингдек, бошқа банклар кафолати ва Экспортни қўллаб-қувватлаш агентлиги кафолати билан таъминлаш;

• заргарлик буюмлари ишлаб чиқариш билан шуғулланувчи якка тартибдаги тадбиркорларга банк кафолати бериш;

• томонларнинг келишувига биноан банк кафолати учун тўлов миқдорини қатъий белгиланган миқдорда белгилаш.