30 ноябрь куни Ромитан туман тиббиёт бирлашмаси таркибида ташкил этилган туманлараро қўшма шикастланишлар ва ўткир қон-томир касалликлари маркази тантанали тадбир билан фойдаланишга топширилди. Тадбирда туман ҳокими Умеджон Барноев, ҳоким ўринбосарлари, жамоатчилик вакиллари, фахрий шифокорлар, нуроний отахонлар иштирок этди.
Марказнинг қурилиш ишларига 8 миллиард сўм маблағ сарфланди. Жиҳозлаш учун Соғликни сақлаш вазирлиги томонидан 9 миллиард сўмга яқин миқдорида маблағ йўналтирилиб, Мультисперал компьютер томографияси (МСКТ) аппарати, замонавий рақамли рентген, лапораскоп, видеоэндоскоп, видеобронхоскоп, дефибрилятор, ИБЛ, УЗИ, лаборатория ва гемодиализ аппаратлари келтирилиб, ўрнатилди.
Туман тиббиёт бирлашмасида очилган туманлараро қўшма шикастланишлар ва ўткир қон-томир касалликлари маркази 50 ўринга мўлжалланган бўлиб, марказда олий тоифага эга 36 нафар шифокор, 73 нафар ўрта тиббиёт ходимлари, 30 нафар кичик тиббиёт ходимлари фаолият кўрсатиши белгиланган.
Туманлараро қўшма шикастланишлар ва ўткир қон-томир касалликлари маркази Ромитан, Пешку ва Бухоро туманлари аҳолисига ҳам шошилинч тиббий ёрдам кўрсатади.
Шунингдек, А-380 “Ғузор – Бухоро – Нукус – Бейнеу” халқаро автомобиль йўлининг Ромитан тумани “Қизилравот” маҳалла фуқаролар йиғини ҳудудидан ўтган қисмида йўловчиларнинг ушбу ҳудудда йўл транспорт ҳодисаси натижасида тан жароҳати олган фуқароларга шошилинч тиббий ёрдам кўрсатиш учун тез тиббий ёрдам масканига Президент совғаси “Реаномобил” автомобили туман ҳокими Умеджон Барноев томонидан тантанали равишда топширилди.
