Куни кеча Ромитан тумани ҳокими Умеджон Барноев ташаббуси билан Россиянинг бир қатор кўзга кўринган тадбиркорлари – ишбилармон доира вакиллари, туман ва шаҳар ҳокимининг иштирокида давра суҳбати Ромитан туманининг қадимий археологик ёдгорлиги, илк ўрта асрлар тарихининг нодир дурдонаси ҳисобланган “Бўронтепа” қўрғони ҳудудида барпо этилган “Bukhara Desert Oasis & Spa” инновацион туризм кластерида ташкил этилди.
Давра суҳбатида вилоят инвестициялар ва ташқи савдо бошқармаси, туман ва шаҳар ҳокимларининг инвестициялар ва ташқи савдо масалалари бўйича ўринбосарлари, шунингдек, вилоятимизда ўз тадбиркорлик фаолиятини олиб бораётган хорижлик мутахассислар ҳам иштирок этди.
Дастлаб меҳмонларга вилоятимизда тадбиркорлар учун яратилган шарт шароитлар, қулай ишбилармонлик муҳити, кенг имконият ва имтиёзлар борасида тушунча берилди. Туман раҳбари У.Барноев вилоятимиз тадбиркорлари ва россиялик ишбилармонлар ўртасида ўзаро тажриба алмашиш, келгусида янги лойиҳаларни амалга ошириш ҳар томонлама манфаатли бўлишини таъкидлади ҳамда ўзининг таклиф ва мулоҳазаларини билдирди.
Тадбирда ИТ, логистика, формацевтика, тўқимачилик саноати, мевани қайта ишлаш ва қурилиш материаллари саноати соҳалари бўйича тақдимотлар ўтказилди. Делегация аъзоларига вилоятнинг инвестицион салоҳияти кенг ёритиб берилди.
