Далаларда жасорат кўрсатиб, давлатимиз хирмонининг юксалишида ўзларининг муносиб улушларини қўшаётган ҳашарчилар ҳолидан хабар олиш, энг чевар теримчиларни муносиб тақдирлаш мақсадида бугун, 15 сентябрь куни Ромитан туман ҳокими Умеджон Барноев “Хоса” маҳалласида жойлашган “Шодмон Ботиробод” фермер хўжалигидаги теримчилар билан учрашди.
Туман раҳбари теримчиларга куч-ғайрат тилаб, пахтани нес-нобуд қилмасдан йиғиштириб олишда жонбозлик кўрсатаётган фермер хўжалиги аъзолари ва отряд раҳбарлари ҳамда теримчиларга ўз миннатдорчилигини билдирди. Шундан сўнг энг илғор теримчиларга ҳар хил турдаги қимматбаҳо совғаларни топширди.
Шундан сўнг пахта йиғим-теримига ўз ҳиссаларини қўшаётган теримчилар учун дастурхон ёзилиб, ош тортилди. Туман маданият бўлими хонандалари иштирок этиб, куй-қўшиқлар билан тадбирга алоҳида кўтаринкилик бахш этишди.
Тадбирда туман прокурори Фаррух Атоев, “WBM Romitex” МЧЖ раҳбари, туман Кенгаши депутати Оматжон Жўрабоев, Халқ депутатлари туман Кенгаши котибияти бўлими вакиллари, ҳудуд депутатлари, Оила ва хотин-қизлар бўлими масъуллари, МФЙ ходимлари иштирок этишди.
