Ромитанда кечанинг ўзида ўндан ортиқ фермер хўжалиги жамоаси пахтачиликда давлат шартнома режасини бажарди. Жумладан, “Хосият биби замини”, “Козимбобо”, “Зафар”, “Сангзамбург файз”, “Варахшо узум экспорт”, “Саидбек Қўрғон замини”, “Бахтиёр”, “Тойир бобо”, “Самандаробод”, “Деҳқонобод”, “Нурмуҳаммадобод” каби фермер хўжаликлари умумий хирмони 500 тоннадан зиёд ва уларда гектарлар ҳосилдорлиги ўртача 40 центнер атрофида.
Масалан, “Варахшо узум экспорт” фермер хўжалигини олсак, 37 гектарда саноат учун қимматбаҳо хом ашё етиштирган жамоа хирмони бугун 116 тоннага етказилган. Худди шундай, “Бахтиёр” фермер хўжалиги тасарруфидаги 10 гектар ердан 47 тонна, “Козимбобо” фермер хўжалиги 15 гектар пахтазордан 64 тонна, “Саидбек Қўрғон замини” фермер хўжалиги эса 6 гектар экин еридан 25 тонналик “оқ олтин” хирмонини барпо этиб, пешқадамлар сафида боришмоқда.
Бугун, Ботир Зарипов Ромитан туманида бўлиб, пахта далаларидаги теримчилар билан учрашди. Суҳбат чоғида вилоят раҳбари энг аввало яратилган шарт-шароитлар билан қизиқди.
Ўрганиш давомида теримчилар учун иссиқ овқат, тоза ичимлик суви ташкил этиш, тиббий хизмат, маданият ва маиший хизматларни йўлга қўйиш, уларнинг саломатлигидан мунтазам хабардор бўлиб бориш, терим пулларини ўз вақтида тўлаб бориш, алоҳида рағбатлантиришлар жорий қилиш, қолаверса, болалар меҳнати ва мажбурий меҳнатнинг олдини олиш каби масалаларга урғу берилди.
