“8-поликлиника раҳбари қўл остидаги ходимга шахсий машинасини ювдиргани” ҳолати ўрганилди
Бухоро шаҳридаги 8-ОП бош врачи Феруза Адизовага тегишли шахсий автомобилни ювишга ҳеч ким мажбурланган эмас. Поликлиникага биркитилган “Тез ёрдам” машинаси ҳайдовчиси чақирув бўлмаган пайтда – ўзининг бўш вақтидан фойдаланиб, олижаноблик юзасидан аёл раҳбарнинг машинасини чангдан тозалаб қўйишни лозим деб топган. Бу ҳақида ҳайдовчининг ўзидан тушунтириш хати олинди.
Ушбу ҳолатнинг ихтиёрий равишда юзага келганидан қатъий назар, Бухоро шаҳар Тиббиёт бирлашмаси раҳбарияти томонидан Феруза Адизовага интизомий жазо чораси сифатида оғзаки огоҳлантириш берилди ва поликлиниканинг иш вақти давомида ходимлар, ҳайдовчиларнинг меҳнат интизомига риоя қилишларини, ортиқча ҳаракатлар билан банд бўлмасликларини назорат қилиш топширилди.
Бухоро вилоят ССБ Ахборот хизмати
