56 миллион сўм алимент тўламаган ота 15 суткага қамалди

Оиладаги тотувлик ва аҳиллик кишининг ҳаётга муҳаббат, касбга садоқат ва атрофдаги инсонларга ҳурмат билан муносабатда бўлиш сингари юксак инсоний фазилатларни шакллантиради.
Афсуски, арзимаган оилавий келишмовчиликлар сабабли оилалар парокандаликка юз тутиб, ажримлар сони ортмоқда. Айрим оталар эса, фарзандлари олдидаги оталик бурчларини унутиб қўйишмоқда.
Бюро органлари иш юритувидаги алимент ундирувлари билан боғлиқ ижро ҳужжатлар ижроси бўйича алимент тўловларини тўлашдан бўйин товлаётган оталарнинг жавобгарлик масаласи ҳал қилинмоқда.
Мисол учун, Бюронинг Ғиждувон тумани бўлими иш юритувида фуқаролик ишлари бўйича Ғиждувон туманлараро судининг 2016 йил 15 март кунидаги ижро варақасига асосан қарздор А.Муродовдан ундирувчи Л.Қурбонова фойдасига икки нафар фарзандининг моддий таъминоти учун қарздорнинг иш ҳақи ва бошқа даромадининг 1/3 қисми миқдорида алимент ундириш тўғрисидаги ижро ҳужжатлари мавжуд.
Ижро ҳаракатлари давомида давлат ижрочиси томонидан алимент қарздорликни бартараф этиш борасида қарздор А.Муродов бир неча бор огоҳлантирилган бўлишига қарамасдан, 2018 йил 01 август кунидан 2023 йил 01 март кунига қадар жами 56.809.415 сўмлик алимент тўловларини тўлашдан бўйин товлаб келган.
Бўлим давлат ижрочиси томонидан қарздор А.Муродовга нисбатан маъмурий иш ҳужжатлари расмийлаштирилиб, кўриб чиқиш учун Жиноят ишлари бўйича Ғиждувон туман судига тақдим этилган.
Жорий йил 6 март куни бўлиб ўтган очиқ суд мажлиси жараёнида қарздорнинг айби, ўз айбига иқрорлик билдириб берган кўрсатуви ва бошқа далиллар билан ўз тасдиғини топган.
Мазкур суднинг қарорига асосан қарздор Ўзбекистон Республикаси Маъмурий жавобгарлик тўғрисидаги кодекснинг 474-моддасида кўрсатилган ҳуқуқбузарликни содир қилганликда айбдор деб топилиб, унга нисбатан 15 маъмурий қамоқ жазоси тайинланган ва жазони ўташ учун ИИБ махсус муассасасига жойлаштирилган.
Бюронинг Бухоро вилояти бошқармаси