Ўзбекистон Республикаси Президенти Шавкат Мирзиёев раислигида жорий йил 13 декабрда кенгайтирилган тарзда ўтказилган видеоселектор йиғилишида Бухоро вилоятини 2023 йилда “Аҳолиси тўлиқ иш билан таъминланган ҳудуд”га айлантириш ҳамда вилоятни жадал суръатларда ривожлантиришнинг асосий йўналиш ва вазифалари белгилаб берилди.

Мазкур вазифалардан келиб чиқиб, вилоят ҳокимлиги томонидан 2023 йилда вилоятни ишсизликдан холи ҳудудга айлантириш, аҳоли томонидан кўтарилган муаммоларни рўйхатга олган ҳолда босқичма-босқич ҳал этиш бўйича зарур чора-тадбирлар кўрилмоқда.

Хусусан, бугун, 28 декабрь куни вилоят ҳокими Ботир Зарипов Бухоро шаҳридаги “Фошун” маҳалла фуқаролар йиғинида бўлиб, маҳалладаги “бешлик” вакиллари-маҳалла раиси, ҳоким ёрдамчиси, ёшлар етакчиси, хотин-қизлар фаоли ва профилактика инспектори билан учрашди.

Мулоқотда маҳаллани иқтисодий фаол ҳудудга айлантириш бўйича амалга ошириладиган вазифалар йўналишлар кесимида кенг муҳокама қилинди.

Маълумотларга кўра, маҳаллада мавжуд 26 та кўп қаватли уй 1 минг 12 хонадондаги 1 минг 42 та оилада 4 минг 113 нафар аҳоли истиқомат қилади.

Муҳокамада маҳалланинг ихтисослашувидан келиб чиқиб, унинг драйверини юзага чиқариш орқали аҳолининг ишсиз қатламини фаол меҳнатга жалб этиш, уларнинг даромадини ошириш бўйича фикр-мулоҳазаларга кенг ўрин берилди. Бундан ташқари, маҳалладаги бошқа муаммоларни ҳал этиш, жумладан, жиноятчиликни олдини олиш, аҳоли бандлигини таъминлаш, инфратузилма ҳолатини яхшилаш, ҳудудни ободонлаштириш, маҳаллада тотувлик ва ҳамжиҳатчиликни таъминлаш каби масалаларга ҳам эътибор қаратилди.

Вилоят раҳбари белгиланган вазифаларни бекаму кўст амалга ошириш юзасидан мутасаддиларга топшириқ ва кўрсатмалар берди.

Маълумот ўрнида, вилоят ҳокимининг ҳудудларда аҳоли бандлиги таъминлашдаги муаммоларни ўрганиш ва ҳал этиш бўйича барча маҳаллалардаги “бешлик” вакиллари ҳамда маҳалла фаоллари билан учрашув ўтказиши режалаштирилган.