⚡️Бухоро вилояти ҳокими Ботир Зариповнинг вилоятдаги давлат ва жамият бошқарувининг турли соҳаларида фаолият юритаётган раҳбар-ходимларга мурожаати
Сўнгги йилларда мамлакатимизда коррупцияга қарши курашиш давлат сиёсатининг асосий устувор йўналишларидан бири сифатида белгиланиб, бу борада туб ўзгаришлар амалга оширилмоқда.
Айниқса, кейинги қисқа давр ичида қабул қилинган қонунлар, Президент фармон ва қарорларида белгилаб берилган устувор вазифалар ижроси натижасида коррупцияга қарши курашиш борасидаги давлат ҳокимияти ва бошқаруви органлари фаолиятининг очиқлиги ва шаффофлиги янада кенгайиб, самарали механизмлар амалиётга татбиқ этилмоқда.
Шунга қарамай, мазкур иллат жамиятимизда учраётганлиги мамлакатимизда амалга оширилаётган ислоҳотларга ўзининг салбий таъсирини кўрсатмоқда.
Коррупция нафақат мамлакатга моддий йўқотиш олиб келади, балки тадбиркорлик ривожига, қонун устуворлигини таъминлашга тўсқинлик қилади, жамиятда ижтимоий кескинликни, ҳокимиятга ишончсизликни, ҳалокатли оғир оқибатларни келтириб чиқаради.
Ҳурматли Президентимиз Шавкат Мирзиёев 2022 йил 20 декабрдаги Олий Мажлис ва Ўзбекистон халқига мурожаатномаларида “Коррупцияга қарши курашишда аҳолининг барча қатламлари, энг яхши мутахассислар жалб қилинмас экан, жамиятимизнинг барча аъзолари, таъбир жоиз бўлса, «ҳалоллик вакцинаси» билан эмланмас экан, ўз олдимизга қўйган юксак марраларга эриша олмаймиз”, деб бежизга таъкидламадилар.
Коррупция ва порахўрлик жамият барқарорлигининг муҳим асоси бўлган адолатнинг йўқолишига олиб келади.
Мамлакатимиз мустаҳкамлиги, халқимиз фаровонлиги, юртнинг ривожи ва гуллаб яшнашини, обод бўлишини истаган ҳар бир фуқаро пора олиш ва бериш, пора олиш ва беришда воситачилик қилиш иллатидан халос бўлиши керак.
Бугунги кунда айрим давлат хизматчилари ўз манфаатларини кўзлаб, жумладан, кредит олишда, қурилиш соҳасида, буджет маблағларини тақсимлашда минг афсуски, ноқонуний ишларга аралашиб қолаётганликларини гувоҳи бўлаяпмиз. Содир этилган ҳар қандай коррупциявий жиноят сирлигича қолмайди, албатта, ошкор бўлади ва қонуний жазосини олади.
Шунинг учун мен сизларни огоҳлантириб ўтмоқчиман, ҳар қандай жиноят учун жазо муқаррардир, буни ҳар бир давлат хизматчиси вужуди билан ҳис қилиши, кўз олдига ота-онаси, фарзандлари ва ака-сингилларини келтиришлари керак.
Давлат хизматчиси – бу оддий ходим эмас, у давлат топшириғи ва манфаатлари бўйича унинг номидан ҳаракат қилувчи инсондир. Шунинг учун давлат хизматчиси деган юксак ҳамда шарафли номга доғ туширмаслик учун энг аввало, ҳалол бўлишимиз, олдимизга қўйилган вазифаларни виждонан, ватанпарварлик туйғусини тўлиқ ҳис этган ҳолда меҳнат қилишимиз лозим бўлади.
Иш фаолиятимизда коррупциянинг ҳар қандай кўринишига муросасиз муносабатда бўлиш, халқимизга ҳалол ва садоқат билан хизмат қилишни асосий бурчимиз ва вазифамиз деб, билайлик!
Фаолиятимизни қайтадан холис таҳлил қилиб, маҳаллий ижро ҳокимияти олдига қўйилган устувор вазифаларни шахсий манфаатимиздан устун қўйган ҳолда сидқидилдан бажаришга барча куч ва салоҳиятимизни сафарбар этайлик!
Юртимизнинг бугуни ва эртаси, ёруғ келажаги учун аввало ўзимиз масъул эканлигимизни унутмайлик!
Барчангизни биргаликда коррупцияга қарши муросасиз кураш олиб боришга даъват қиламан!
