“Ҳудудгаз Рақамлаштириш” филиали ходимлари “ҲГТ Сервиcе” дастурий таъминотни – газ ускуналарининг ҳолати тўғрисида батафсил маълумотларни масофадан йиғиш ҳамда ҳар бир абонент бўйича табиий ва суюлтирилган газдан оқилона фойдаланишни назорат қилиш технологиясини ишлаб чиқдилар.
Ушбу дастур газ ускуналарини кундалик ҳаётда ишлатишда истеъмолчилар хавфсизлигини таъминлашга, газ таъминоти тизими ходимлари томонидан газ жиҳозларига техник ва профилактик хизмат кўрсатиш бўйича мажбурий хизматлар сифатини баҳолаш ва ўзаро ҳисоб-китобларни нақд пулсиз амалга оширишга қаратилган.
Истеъмолчиларга қулайлик яратиш учун ишга туширилаётган янги дастурий таъминот абонентнинг шахсий маълумотлари, хонадон геолокацияси ва телефон рақами каби маълумотларни ўз ичига олган. Шунингдек, дастурга истеъмолчида маиший газ ускуналарининг мавжудлиги ва уларнинг техник ҳолати тўғрисида маълумотлар киритилган. Дастурнинг яна бир хусусияти шундаки, у хизмат сифатини баҳолаш ёки шахсий кабинет орқали истеъмолчининг шикоятини узатиш имкониятига эга.
“ҲГТ Сервиcе” дастури газ етказиб берувчи ва истеъмолчи ўртасида газ ускуналарига профилактик ва техник хизмат кўрсатиш бўйича ўзаро ҳисоб-китобларни тартибга солиш ва уларни нақд пулсиз амалга оширишга имкон беради. Кўрсатилган сервис хизматлар учун тўлов (инвойс) СМС орқали онлайн режимида тақдим этиш йўли билан амалга оширилади ва бунинг тўғрисидаги хабар хизмат тугагандан сўнг дарҳол истеъмолчининг телефонига келади.
Таъкидлаш жоизки, бугунги кунда соҳанинг 2,5 минг нафардан ортиқ ходимлари ўз малакасини ошириб, газ ускуналарига юқори сифатли техник ва профилактик хизмат кўрсатиш, газ тармоқларининг герметиклигини текшириш, уларни созлаш, тозалаш ҳамда газни тартибга солиш пунктларига техник ва профилактик хизмат кўрсатиш, газ плиталари ва қозонларни ўрнатиш ва таъмирлаш, уларни мавсумга мос равишда созлаш, ишга тушириш, қурилиш-монтаж ишларини бажариш, истеъмолчиларнинг газ тармоқларини лойиҳалаш ва газ таъминоти соҳасидаги бошқа турдаги техник ишларни амалга оширишга қодир.
Фурсатдан фойдаланиб, “Ҳудудгазтаъминот” АЖ истеъмолчиларга газ таъминоти юқори хавфга эга бўлган соҳа эканлигини, газдан фойдаланиш алоҳида эътибор талаб қилишини ҳамда газ жиҳозлари доимий профилактика ва техник хизматга муҳтож эканлигини эслатиб ўтади. Ушбу хизматларнинг ўз вақтида амалга оширилиши истеъмолчиларга газ жиҳозлари тўғри ишлаётганлигига амин бўлиш, уларни тўғри ишлатиш юзасидан йўл-йўриқ ва кўрсатмаларини олиш, газ сизиб чиқиши ҳолатларини аниқлаш ва бартараф этиш орқали ортиқча газ ҳисоби юритилаётганлигини текшириш, дудбуронлар диагностикаси ва текширувини амалга ошириш, газ ускуналарини тасдиқланган техник нормаларга мувофиқ ўрнатишга имкон беради.
Амалдаги қонунчиликка мувофиқ, Ўзбекистонда ҳовли уйларда газ жиҳозларига техник хизмат кўрсатиш даврийлиги йилига камида бир марта, кўп қаватли уйларда – икки йилда бир марта этиб белгиланган. Истеъмолчининг хоҳишига кўра, газ таъминоти ташкилотлари ходимлари газ таъминоти соҳасида қўшимча хизматлар кўрсатишга тайёр. Бу бўйича тегишли аризани 1104 қисқа рақами орқали ягона Колл-марказга қўнғироқ қилиш ёки истеъмолчининг шахсий кабинети орқали қолдириш мумкин.
