Андижон тумани ҳокими Абдужаббор Эгамбердиев туман фуқароларини ноанъанавий тарзда қабул қиляпти: ўзи айвончанинг тўрида, фуқаролар эса пойгакдан жой олади. Ҳокимнинг матбуот котиби қабулларда ижтимоий масофа сақланаётганини маълум қилди.
Хусусан, 6 август кунги қабулда ҳам туман ҳокими фуқаролар билан оралиқ масофани жуда катта сақлаганини кўриш мумкин. 20 августдаги ҳоким қабулида ҳам фуқароларга пойгакдан жой қилиб берилган.
Бу ҳолат ижтимоий тармоқ фойдаланувчилари ўртасида муҳокамаларга сабаб бўлди. “Ўрта аср хонликлари даврини эслатмоқда” деб ёзди фойдаланувчилардан бири изоҳларда. “Ҳоким эмас, хон!” – деб ёзган бошқа бир фойдаланувчи.
Кўплаб ҳудудлар ҳокимлари фуқаролар билан учрашув ва қабулларда юзма-юз ўтириб, улар билан яқин эканликларини ифода этаётган бир вақтда, Андижон туман ҳокими Абдужаббор Эгамбердиевнинг бундай йўл тутишини жамоатчилк танқидий кутиб олган.
