Мустақил давлатчилигимиз рамзларидан бўлган байроғимиз ўзида Ватанимиз ўтмиши ва бугунининг муҳим қирраларини акс эттиради. Юрт байроғига нисбатан ҳурмат туйғусини юксалтириш, унинг улуғворлик касб этувчи моҳият мундарижасини англаш барчамиз учун муҳим вазифалардан бири ҳисобланади.
Ҳарбий хизматчиларнинг Ватан байроғи пойида тиз чўкиб, муқаддас Она тупроғини матонат ва садоқат билан ҳимоя қилишга қасамёд қилиши бежиз эмас. Чунки байроқ жасорат, ғурур, фидойилик, ор-номус мактабидир.
Бухорода ҳам миллий юксалиш мужассам улуғвор Ватан тимсоли, мустақил Ўзбекистон Республикасининг “Давлат байроғи тўғрисида”ги Қонуни қабул қилинганлигининг 32 йиллиги кенг нишонланди.
Дастлаб Абу Али Ибн Сино номидаги Фавворалар майдонида ўрнатилган улкан байроқ олдида тантанали тадбир ташкил қилинди. Унда вилоят ҳокими Ботир Зарипов, вилоят секторлари раҳбарлари, вилоят ҳокими ўринбосарлари, уч минг нафардан ортиқ ёшлар, кенг жамоатчилик вакиллари ҳамда оммавий ахборот воситалари ходимлари иштирок этди.
Тадбирда сўз олган вилоят раҳбари Ўзбекистон Республикаси давлат байроғи қабул қилинганининг 32 йиллиги билан барчани табриклади.
Таъкидланганидек, муқаддас туғимиз энг олий саҳналар, энг юқори марраларда, жаҳон ареналарида, нуфузли спорт мусобақаларида баланд кўтарилиб, Янги Ўзбекистоннинг чинакам бўй-бастини намоён этаётгани барчада ғурур ва ифтихор туйғуларини жўш урдиради.
Шундан сўнг Миллий гвардия, Ўзбекистон Мудофаасига кўмаклашувчи “Ватанпарвар” ташкилоти, Автомотоҳаваскорлар жамияти томонидан автокарвон ташкил қилиниб, давлат байроғи илинган машиналар шаҳар кўчалари бўйлаб ўтди.
